“Haurtzaroa eta umeen eskubideak indartzeko”, adingabeen babes juridikoaren erregimena aldatzea onartu du gaur Espainiako Ministroen Kontseiluak. Batetik, sexu abusu eta genero indarkeria kasuetan zorrotzago jokatuko dute erakundeek. Tratu txarrak jasan dituzten emakumeen babes programetan beren seme-alabak txertatuko dituzte; bortizkeriaren hartzaile edota lekuko izan direnean, biktimizazio bikoitza saihesteaz ere mintzatu da Ana Mato Osasun eta Berdintasun ministroa, “testigantza behin eta berriro errepikatzen ibil ez daitezen”. Halaber, sexu askatasunaren aurkako delituen ondorioz zigortutakoek ezingo dute umeekin lotutako lanbideetan jardun.
Bestetik, umeen harrera eta adopzio prozesuak “bizkortzeko” hainbat neurri ere hartu ditu gobernuak. Egoitza harreraren aurretik, familietako harrera lehenetsiko dute; 3 urtetik beherakoekin ahalegin berezia egin nahi du, “egoitzetatik igaro ez daitezen”. Era berean, “adopzio irekia” deiturikoa arautu du Matok: “Adingabeek harreman motaren bat eduki ahal izango dute euren guraso biologikoekin”. Gainera, gurasoon nortasunaren eta historia medikoaren berri izateko eskubidea eman die haur adoptatuei; 18 urte betetzean eskatu ahalko dute informazio hori, baita adingabeek ere, “euren legezko ordezkarien bidez”.
Gizartea
Umeak ere genero indarkeriaren biktimatzat hartuko dituzte
Adingabeen babesari buruzko legedia aldatu du Espainiako Gobernuak. Adoptatutako haurrek guraso biologikoei buruzko informazioa eskatzeko eskubidea izango dute.
Iruzkinak
Ez dago iruzkinik
Ordenatu
