Espainiako Fiskaltzak Jose Luis Castro epaileari idatzi bat igorri dio, eskatuz Madrilgo Mediku Elkargoko bi onkologok berrikus ditzatela Donostia ospitaleak Josu Uribetxebarria presoaren egoeraz eginiko azken txostena eta Auzitegi Nazionaleko sendagileek egingo dutena.
Espainiako Auzitegi Nazionaleko fiskal Pedro Rubirak uztailaren 9an eskatu zuen "berriro kalkulatzeko" zein den Josu Uribetxebarriaren bizi-itxaropena. "Gaixoaren egoeraren ebaluazio berri bat" eskatu zion idatziz Auzitegi Nazionaleko Espetxe Zaintzari, argudiatuta Uribetxebarriak "tratamendua" jaso duela eta haren bizitza "arriskuan" ote dagoen "berriz kalkulatu" behar dela.
Fiskalak nahi du Madrilgo epaitegi horretako auzitegi mediku Carmen Baenak idaztea txostena; iaz, Baenak ebatzi zuen Uribetxebarriak kartzelan jaso zezakeela minbiziaren aurkako tratamendua. Donostia ospitaleak eginiko txostenak "argiki inkongruenteak" direla uste du Rubirak, eta "zorroztasun falta deigarria" antzeman du agirietan.
Iazko irailetik baldintzapean aske dago Uribetxebarria, giltzurruneko minbiziagatik. Iragan astean bertan galdetu zion Espainiako Barne Ministerioak Donostia ospitaleari Uribetxebarriaren osasun egoeraren inguruan, eta erietxeak berretsi zuen hark duen minbizia "atzera bueltarik gabekoa" dela eta ezin dela espetxean tratatu.