Carlos Urkijo Espainiako Gobernuak Euskal Autonomia Erkidegoan duen ordezkariak hizpide izan du bihar Durango eta Iruñea batuko dituen giza katea. Uste du "independentziarekin lotura duen edozein aldarrikapenek" porrot egingo duela eta, beraz, erabakitzeko eskubidearen aldeko ekimen horrek "frustrazioa" eragingo duela deitzaileen eta parte hartzaileen artean.
Arakako gune militarrean egin ditu adierazpenak Urkijok, Gasteizen. Bertan eskatu du gauzaei "euren izenarekin" deitzeko eta "eufemismoak" alde batera uzteko: "Bihar proposatuko dutena ez da erabakitzeko eskubidearen aldeko giza kate bat, independentziaren aldekoa baizik". Horren harira, erantsi du Espainiako Konstituzioa "nazio espainiarraren batasun hautsezinean" oinarritzen dela.
Carlos Antonio Terol generalak ere hartu du hitza. Ohartarazi du Araban, Bizkaian eta Gipuzkoan dauden 1.300 militarrak "hala behar dituztenerako prest" daudela.
