Iñigo Urkullu Eusko Jaurlaritzako lehendakariak hizpide izan du EPPK Euskal Preso Politikoen Kolektiboko kide diren presoek hurbiltzeko eskaerak egiten hasi izana. Euskadi Irratian eginiko elkarrizketan, azaldu du ez dakiela "testualki" zein den eskaeraren mamia, baina, haren ustez, "hor badago onurak jasotzeko orduan damuaren zentzua edo egindako min injustuaren aitormena".
Uste du presoak "bideratzeko ariketa batean" ari direla, eta oroitarazi du Espainiako Konstituzioan presoen gizarteratzea ageri dela espetxealdiaren helburu gisa. Halaber, ohartarazi du "tentazioa" egon ohi dela "eszenifikazioak" hauteskundeekin lotzeko.
"Presoek egin beharreko bidea egin behar dute, eta aitormena gakoa da. Beste batzuok isilean lan egin beharko dugu, Espainiako Gobernuarekin adostasun bat bilatuz", azaldu du Urkulluk.
Ahotan izan du ETAk desarmatzerantz eginiko urratsa ere. "Eszenifikazio oso bitxia" izan zela uste du, ez zela "nahikoa" izan, eta "ETAk nahiz izanez gero" Ertzaintza desarmatzean parte hartzeko prest legokeela adierazi du. Hala ere, ohartarazi du horrek "berme juridiko eta legal bat" behar duela eta horregatik Espainiako Gobernuarekin adostasuna bilatu beharko litzatekeela.
Bestalde, Bilbon eginiko Global Forum Spain bilkuraz mintzatu da. "Gu ez ginen antolatzaileak, gonbidatuak ginen. Harrera bat egin behar genien, eta mezu bat plazaratu behar genuen; Euskadi zer den eta Euskadiren ekonomia nola garatu den, zein den egungo egoera eta zerk egiten gaituen ezberdin; eta, krisi egoeran, zertan jarri behar dugun indarra".
