Iñigo Urkullu lehendakariak atzo adierazi zuenez, Iñigo Cabacasen heriotza "tamalez erremediorik gabeko akatsa izan zen". Berretsi zuen Jaurlaritzak konpromisoa hartu duela epaileei informazioa emateko, eta justiziari auzia "lehenbailehen" argitzeko deia egin zion.
Gainera, Jaurlaritza "prest" dago familiari eta gizarteari dakiten guztia azaltzeko. "Merezi dute erantzun bat", esan zuen.
Horrez gain, adierazi zuen "testuingurutik atera direla" Gervasio Gabirondo Ertzaintzako buruaren eta Estefania Beltran de Heredia Segurtasun sailburuaren hitzak, esandakoan gertatutakoa istripua izan zela.
Aurrekontuekin, "azken minutura arte"
Aurrekontu proiektua aurrera ateratzeko "azken minutura arte" lanean jarraituko duela esan zuen Urkulluk. Gogorarazi zuen aurrekontuak ez direla soilik lehendakariarentzat edo gobernuarentzat, gizarte guztiarentzat baizik.
Beharrezkotzat jo zuen hainbat aldaketa egitea zerga sisteman, eta tartean aipatu zituen zerga iruzurraren aurkako plana, pertsona fisikoen gaineko errenta eta sozietate zerga.
