Iñigo Urkullu EAJko EBBko presidenteak gaur PSE-EEren gobernuari leporatu dio legealdia hasi zuenetik ez duela "proiektu bakar bat ere" martxan jarri, eta "besteei galdetzeari" uzteko deia egin dio. Urkulluk bere blogean argitaratu duen artikuluan gogorarazi du Eusko Jaurlaritza dela "agindu" behar duena, "Euskadi atzeratze egoeratik ateratzeko". Atzo Jose Antonio Pastor PSE-EEko bozeramaileak erreforma fiskala zehazteko bilkura monografikoa eskatu ondoren argitaratu ditu adierazpenok.
Urkulluk azaldu du larunbatean hiru urte beteko direla Patxi Lopez Eusko Jaurlaritzako lehendakari hautatu zutenetik, eta haren arabera, "orain dela hilabete batzuk [EAEko] legealdia zabor minutuetan dago". Andoni Ortuzar EAJko Bizkai Buru Batzarreko presidenteak Urkulluren adierazpenen ildotik jo zuen duela egun batzuk.
"Jokoan dagoena gure autogobernuaren garapena da, eta ongizatearen gizartearena", adierazi du Urkulluk. Haren arabera, Jaurlaritza ez da "jokatzeko gai", eta "ikuskizun penagarria" eskaintzen ari da haren kide den EAEko PPrekin.
