75 legebiltzarkideetatik gutxienez 25 akreditatuta egotea beharrezkoa da Eusko Legebiltzarreko araudiak aurreikusitako epeak martxan jartzeko. Astelehenean aurkeztu zituzten egiaztagiriak Elkarrekin Podemoseko 11 parlamentariek, eta beste horrenbeste egingo dute ostegunean EAJko 28ek. Hori horrela, 39 izango dira akreditatutakoak, eta martxan jarriko dira epeak.
Behin EAJkoek egiaztagiriak aurkeztuta, Bakartxo Tejeria Diputazio Iraunkorreko presidenteak deituko du Eusko Legebiltzarra eratzeko batzarrera; hamabost eguneko epean egin beharko dute bilkura hori, eta beraz, urriaren 28rako lanean ariko da parlamentua.
Lehen bilkura urriaren 20an edo 27an izan liteke, Eusko Legebiltzarrean ostegunetan izaten baitira osoko bilkurak. Aurrenekoan, mahaiko bost kideak eta mahaiko presidentea aukeratu beharko dute. EAJk azaldua du mahaian bi kide izateko asmoa, eta horrek kanpoan utziko luke PP.
