Herrira-k agerraldi bat egin du gaur goizean, urtarrilaren 12rako Bilbon euskal presoen eskubideen alde antolatu duten manifestazioari buruzko xehetasun gehiago emateko. Protestari atxikimendua adierazi dioten eragileen "pluraltasuna" nabarmendu du Ines Osinaga Gose musika taldeko abeslariak martxaren talde sustatzailearen izenean, eta dei egin die zalantzan daudenei. "Bakeari eta giza eskubideei bultzada erabakigarria" emateko eskatu die.
Egun osorako ekitaldiak prestatu dituzte, eta Bilbora garraio publikoz joateko eskatu du Osinagak. Gaineratu du Euskal Herri osoan antolatzen ari direla Bilbora joateko autobusak, baina ez du ezagutarazi antolatutako zenbat autobus joango diren Bizkaiko hiriburura.
Egunean bertan, 300 pertsona ariko dira boluntario lanetan. Gainera, manifestaldiak nazioartetik jasotako babesa ere aipatu du; adierazi duenez, Saharatik, Argentinatik eta Mexikotik adierazi diete babesa, besteak beste.
