2006tik 2010era Youtuben bideo batzuk jartzeagatik zigortu dute Albisu. Edukietan "ETA talde terrorista" goratzen duela argudiatu du epaileak. Albisuk epaia atera baino lehen jakinarazi zuenez, "sarean euskal gatazkari edo munduko edozein gatazkari buruz aurki daitezkeenak" bezalakoak dira bideoak.
Albisuk iazko uztailean deklaratu behar izan zuen Eloy Velasco epailearen aurrean, eta apirilean izan zuen epaiketa. Hong Kongen bizi da egun: "Milaka kilometro egin behar izan ditut sasi-epaiketa horretan parte hartu ahal izateko". Fiskalak urte eta erdiko kartzela eta hamar urterako gaitasun gabetzea eskatu zuen.
"Zirku bat"
Gutunean salatu zuen "zirku bat" izan zela epaiketa, eta beldurra eragiteko eta Interneten adierazpen askatasuna mugatzeko saio bat izan dela guztia, sare sozialetako jardunagatik azkenaldian egin diren operazioak bezala. "Ez dago eskubiderik horrelako jazarpen ideologikoa jasateko".
