Usansoloren (Bizkaia) desanexiorako bideari hasiera eman dio Galdakaoko Udalak. Gaur bildu da Galdakaoko Udalbatza, eta oniritzia eman dio Usansoloko herritarrek euren egituraketa erabakitzeko prozesuari. EH Bildu, Auzoak, Podemos, Usansolo Herria eta EAJ alderdien eta atxiki gabeko zinegotzi baten babesa izan du erabakiak. Denera 19 boto. Aurka agertu dira, berriz, PSEko bi kideak.
Modu horretan, foru arauek segregazio kasuetarako ezarritako ibilbidea hasi du Galdakaoko Udalak. Batzorde misto bat eratuko dute udaleko eta Usansoloko ordezkariez osatua. Udalaren arabera, batzordearen lana izango da datozen hilabeteetan egin beharreko txostenen jarraipena egitea. Izan ere, lau hilabeteko epea izango dute Bizkaiko Foru Aldundiari beharrezko txostenak aurkezteko; besteak beste, bideragarritasun ekonomikoari eta desanexioaren ondorioei dagozkienak.
Ongi bidean, Bizkaiko Batzar Nagusietara iritsi beharko litzateke afera, ondoren Galdakaora itzuli eta, azkenik, Usansolon desanexioaren inguruko galdeketa egiteko. Udalak adierazi du bere esku dagoen guztia egingo duela «usansolotarren erabakia errespetatu eta gauzatu dadin oinarrizko ariketa demokratiko gisa».
