Frantziako nazioaren besta eguna da uztailaren 14a, eta U14 kolektiboak egun hori hautatu du protesta egiteko, Donibane Lohizunen (Lapurdi). «Asimilaziotik erresistentziara, ez gara frantsesak» lelopean eginen dute manifestazioa. «Frantziako besta eguna dela baliatuz, beraien menpe duten Euskal Herria Frantziako ikurrez josten dute, eta egoera hau normalizatuz doa zoritxarrez. Azken urteetan ugaritu egin dira gure herriaren kontrol osoa hartzeko ahaleginak», salatu dute.
Ipar Euskal Herriko turismo «masiboa» salatzeaz gain, erran dute euskara egoera «larrian» dela: «Frantziak turismoa garatu du gure lurretan, Frantziarekiko dependentzia sortzeko helburuarekin. Kolonizazio prozesuan sakontzen dihardu, Frantziako biztanleak gure herrian bigarren etxebizitzak erostera bultzatuz, eta bertakoak kanpora bizitzera joatera kondenatuz. Hizkuntz ordezkatze prozesua garatu du eskolen bitartez bereziki, euskara desagertze bidean jarri arte».
Gainera, salatu dute azken hilabeteotan pandemiaren harira hartutako neurriek Ipar eta Hego Euskal Herriaren arteko mugak ixtea eragin duela: «Inposatu diguten muga nahieran ireki eta itxi digute. Arnegiar (Nafarroa Beherea) bati Bordelera (Okzitania) joatea baimenduz, Luzaidera (Nafarroa) igarotzea debekatuz, adibidez».
Hala, «erresistentziara» deitu dute, eta uztailaren 14an manifestaziora joateko dei egin dute.
