Botiken berrordainketarako laguntza jasotzeko baldintzak betetzen dituzten pertsonak uztailaren 1etik aurrera hasiko dira jasotzen. Legebiltzarreko batzordean, PSEko Blanca Roncalek galdera egin dio laguntza horiei buruz informatzeko emandako pausoez.
Sailburuak azaldu du informazio kanpaina bat egin dela eta 100.000 pertsonak egin dutela eskaria. Ez du zehaztu eskatzaileen artean zenbatek betetzen dituen laguntzak jasotzeko baldintzak, baina ekainaren hasieran adierazi zuen eskarien %90i erantzuteko moduan egongo zela Jaurlaritza.
Eusko Jaurlaritzak emango dituen laguntzak honako hauentzat dira: urtean 18.000 euro baino gutxiagoko diru sarrera duten pentsiodunak, ordainsaria jasotzen ez duten langabeak eta balibide nahikorik ez duten immigranteak. Roncalen iritziz, informazio kanpaina "porrota" izan da; izan ere, "oso eskaera gutxi" dira, kontuan izanik balizko onuradunak 400.000 baino gehiago direla.
