Txentxo Jimenez parlamentariak irailaren hasieran bere hautagaitza erretiratu ostean, koordinatzaile izateko hautagai bakarra zen Lasa. Gainera, militanteek zuzendaritzako kideak ere hautatu dituzte.
Horra babes handienetik txikienera: Aritz Romeo Iruñeko zinegotzia %84,8rekin; Pablo Azkona Lodosako alkatea %72,7rekin; Ana Barrena Iruñeko zinegotzia, %71,2rekin; Maite Iturre, Udalbiltzako lehendakari orde eta Baztango hautetsia %66,6rekin; Zutoia Toral Zizur Nagusiko hautetsia %57,6rekin; Floren Luki Barañaingo alkate ohia %56rekin; Asun Fernandez Garaialde parlamentaria %54,5rekin; Etor Larraia militantea %34,8rekin eta Pedro Huarte Zizur Nagusiko alkate ohia %33,3rekin. Mikel Egozkue ingeniaria ere zuzendaritzako kide da, baina jasotako babesaren daturik ez du eman Aralarrek.
Zuzendaritza hautatzearekin batera, aurreko buruzagitzak landutako ponentzia politikoa onartu da, botoen %79,62rekin. Hurrengo lau urteetarako ildo politikoari 19 zuzenketa egin dizkiote militanteek. Beste hamairu zuzenketa eztabaidatu baina ez dira onartu. Testuan, EH Bildu Nafarroako aldaketarako giltza dela proposatzen dute, baina era berean, koalizioak Nafarroaren berezitasunak kontuan hartu behar dituela ere nabarmentzen dute.
