Gaur zendu da Xan Marguirault (Donibane Lohitzune) Ipar Euskal Herriko militante ezaguna. 1977ko abenduaren 23an atxilotu eta Iparretarrak erakunde armatuko lehen militante presoa izan zen. Sustengu haundia eragin zuen gertakaria izan zen, eta Lapurdi, Behe Nafarroa eta Zuberoan barna Xan Komiteak muntatzen hasi ziren. 1978ko agorrilaren 23an askatu zuten. Urte berdinean Xan Komiteen bitartez garatu sareak Herri Taldeen sorrera ahalbidetu zuen. Eneko Bidegainek hala dio Iparretarrak Erakunde politiko armatu baten historioa liburuan “erran daiteke Xan Marguiraulten espetxeratzeak abertzale belaunaldi bat bildu eta egituratu zuela, bai politikoki, bai publikoki”.
Autonomia Eraiki talde politikoan ibilia zen geroztik, Ipar Euskal Herrirako autonomia estatutu baten aldarrikapena hedatzen.
