Iragan astean Gasteizko Epaitegiak ebatzi zuen Nafarratek eroriko batengatik-edo hartu zuela min, ez ertzainen gomazko pilota batek jota."Harrituta" jaso zuen berria Nafarratek, nahiz eta "ez genuen Justiziaren aldetik askorik espero". Areago, esan du ez dela kasualitatea epaileak eginiko autoa eta Rodolfo Ares Eusko Jaurlaritzako Herrizaingo sailburu ohiaren adierazpenak "berdinak" izatea.
Iazko martxoaren 29ko grebako gertakariek ere harritu zuten Nafarrate: "Denok imajinatzen genuen 29ko greba bereziki bortitza izango zela, baina nik ez nuen inondik ere espero gertatutakoa". Pilotakada jaso aurreko hainbat une ez ditu oroitzen, baina bai, ordea, beste batzuk: "Badut momentu horietako beldur sentipenaren memoria".
Gainera, uste du Justiziaren lehentasuna "agintariak babestea" dela, eta nabarmendu du bizitakoak uste hori berretsi diola.
