Nafarroako Unibertsitate Publikoak gaur ireki du matrikulazio epea lehen ikasmailarako onartuak izan diren ikasle berrientzat. Osasun egoera kontuan hartuta, Interneten bidez soilik egin ahal izango dute matrikula, eta unibertsitatearen webgunean dute informazio guztia eskuragarri.
Matrikulazioaz gain, unibertsitatean aurten hasiko diren ikasleentzat ikastaro batzuk antolatu ditu NUPek abuzturako, aurretik dituzten ikasketen eta unibertsitatean egingo dutenaren arteko trantsizioa errazagoa egiteko. Aurten, Adierazpen Grafikoa, Estatistika, Fisikaren Hastapenak eta Matematika kurtsoak izango dira.
