Jon Ander Cob eta Julen Goikoetxea Altsasuko auzian epaitutako bi gazteak Zaballako kartzelara ekarri dituzte. Altsasuko gazteen gurasoek Twitterren duten kontuan jakinarazi dute Zaballako espetxetik bertatik hots egin dietela telefonoz gaur goizean. Adierazi diete elkarrekin daudela eta gainerako gazteak aurki batzeko esperantza dutela.
Soto de Realgo (Madril) kartzelatik ekarri dituzte Arabakora. Joan den ortziralean jakin zuen BERRIAk gerturatuko zituztela. Berri agentziek zabaldu dutenez, asteazkenean atera ziren Madrildik, eta gaur goizean iritsi dira Zaballako espetxera. Datorren ortziralean, auzi berean epaitutako Aratz Urrizola ere hara mugituko dutela zabaldu du El Correo kazetak. Euskadi Irratiak, berriz, Adur Ramirez de Alda Iruñeko kartzelara ekarriko dutela zabaldu du.
Altsasuko zortzi gazteri kartzela zigorra ezarri zieten aurtengo ekainaren 1ean, kaleko jantzitako bi guardia zibil eta haien bikotekideak jotzea leporatuta. 2016ko urriaren 15eko goizaldean liskarra izan zen gazteen eta guardia zibilen artean, taberna batean. Espainiako Auzitegi Nazionaleko lehen aretoko epaimahaiak 79 urteko kartzela ezarri zien guztira zortzi gazteei. Zortzietatik zazpi daude espetxean.
Espainiako Guardia Zibilak ekainaren 5ean atxilotu eta espetxeratu zituen Jon Ander Cob, Julen Goikoetxea, Iñaki Abad eta Aratz Urrizola. Oihan Arnanz, Adur Ramirez de Alda eta Jokin Unamuno, berriz, espetxean daude 2016ko azarotik. Ainara Urkijori bi urteko kartzela zigorra jarri zioten, eta ez dago espetxean.
