Zarautzen egin dute erlauntza

Jaia eta herritarren parte hartzea BERRIA Taldearen aldeko ekintza bihurtu zituzten atzo Zarautzen, Gipuzkoan, Ziztada Egunean: Zure ziztada behar dugu kanpainaren berri zabaltzeko eguna izan zuten. Ziztada emateko prest dauden herritarren bila jarraitzen dute herriz herri, egoeraren larriaz ohartarazteko, eta hori zuten helburu atzo ere: erlauntza sortzea, BERRIA Taldearen alde ziztada egiteko prest daudenekin. Eguraldi makurra egin bazuen ere, dozenaka eta dozenaka lagun batu ziren ekitaldietara goizetik.

Herri lasterketa batekin hasi zuten eguna. Guztiek egiteko moduko ibilbidea prestatua zuten; ehundik gora lagun atera ziren. Lasterketan izena emateagatik batutako dirua kanpainarako jarri dute, horren beharrean baitago BERRIA Taldea. Inoiz baino irakurle gehiago dauzka —harpidetzei eutsi die, eta Interneteko hazkundea etengabea da—, baina, diru iturrien beherakada dela eta, hankamotz ari da geratzen aurrera jarraitzeko. Publizitatea jaitsi egin da nabarmen —hirutik bat desagertu da—, eta erakunde publikoek ere eskastu egin diote diru laguntzen bidezko ekarpena.

Herritarrengana jo du taldeak, diru ekarpenen bila. Herritarren babesa ezinbestekoa dela nabarmendu zuten atzo, Zarautzen ere. Lasterketaren ostean, bertsotan aritu ziren Felix Zubia eta Ainhoa Agirreazaldegi; euskarazko eguneroko bakarrak aurrera egiteak duen garrantziaz jardun ziren. Irudien bidez ere azaldu zuten behar hori: mural bat egin zuten Jurgi Olaizolak eta Jon Arangurenek, erleak aitzakia hartuta. Erleekin postu bat ere jarri zuten. Larrain dantza egin zuten gero, eta mokadu bat ere hartu zuten.

Lanean herriz herri

Zarautzen ez eze, beste herri askotan ere ari dira BERRIA Taldeari lagundu beharra zabaltzen. Datorren astean, bilerak dituzte herri hauetan: asteazkenean, Ugaon eta Lizarran; eta, ostegunean, Ondarroan. Ekainaren 3an, igandearekin, kontzertu bat izango da Donostian, Antzoki Zaharrean.

BERRIA Taldearen Zure ziztada behar dugu kanpainaren berri jakin edo ekarpen bat egin nahi izatera,jo webgune honetara:www.berria.info/berrialaguna