Ibilgailu bat errepidetik atera eta irauli egin da gaur goizean, N-1 errepidean, Burgun (Araba) Donostiarako noranzkoan. Ondorioz, zazpit lagun zauritu dira: 36 urteko gizonezko bat, 28 urteko emakumezko bat, haien 9, 4, 3 eta urtebeteko seme-alabak eta 14 urteko gaztetxo bat -familiako kidea edo laguna izan daitekeena-. Urtebeteko haurra Gurutzetako erietxera eraman dute helikopteroan, eta gainerakoak, Txagorritxura, errepidez.
Jaurlaritzako Herrizaingo Sailak agertu duenez, Erresuma Batuan bizi zen istripua izan duen familia, eta sortzez portugaldarrak ziren. Hain zuzen, Portugalen oporrak pasa eta etxera itzultzeko bidean ziren ezbeharra gertatu denean. Argitzeke dauden arrazoiak tarteko, bidetik atera da Seat Alhambra ibilgailua, eta kontrako noranzkoan geratu da iraulita. Goizeko zortziak hamar gutxi inguruan gertatu da ezbeharra; hamarretan lortu du Ertzaintzak errepidea garbitu eta berriro trafikora zabaltzea.
