Zazpi komunikabidetako zuzendariek Espainiako Auzitegi Nazionalak ‘Gara’-ren kontra abiatutako prozedura penala salatu dute

Barruko testua: Gara-ko zuzendari Josu Juaristi inputatu du Teresa Palacios Espainiako Auzitegi Nazionaleko epaileak, joan den irailaren 27an, Gudari egunarekin, egunkari horretan ETAren komunikatu bat argitara emateagatik. Terrorismoa goratzea egozten dio.

Ekinbide judizial horiek abiatzea salatu dute zazpi komunikabidetako zuzendariek. Gainera, elkartasuna adierazi diete egunkari horren zuzendari eta langileei.

“Talde armatuen agiriak, komunikazioak eta elkarrizketak argitaratzeaezin da delitua izan” haien irudiko, “demokratikoa izan nahi duen sistema politiko batean”. Hori, herritarrei informazioa ematea dela diote, “Espainiako jurisprudentzian adibide ugari baitaude irizpide hori bermatzen dutenak.

Beraz, ekinbide horiek, adierazpen askatasuna urratzen dute zazpi zuzendari horien ustetan. Komunikabideen “lanerako askatasuna” itotzen dutela, enpresa argitaratzaile bat arriskuan jartzen dutela eta ehunka kazetariren lana zalantzan jartzen dutela azpimarratu dute.

Gainera, “zoritxarrez” ez dela hori gertatzen den lehen aldia gogorarazi dute, eta beraz, Espainiako Justiziari eskatu diote Euskal Herriko Komunikabideei “beren lana bakean egiten” uzteko.

EITBren zuzendari Andoni Ortuzarrek, Deia ren zuzendari Iñaki Gonzalezek, Diario de Noticias de Navarra ren zuzendari Pablo Muñozek, Diario de Noticias de Alava ren zuzendari Julio Iturri, Le Journalen zuzendari Hur Gorostiagak, Herri Irratiko zuzendari Alex Aranzabalek eta Berria =i ren zuzendari Martxelo Otamendik sinatu dute agiria.