Bilboko Hontzak konpartsaren txosnako dekorazioa kendu zuen Ertzaintzak astelehen goizean, gotzaingoak salaketa jarri ondoren. Igande arratsaldean aurkeztu zuen salaketa, txosnak "biraozko" edukiak zituelakoan. Bilboko 3. Instrukzio Epaitegiak igandean agindu zuen eduki horiek kentzeko eta konpartsako kideak identifikatzeko.
Horri erantzuteko, "prozesio" bat egin dute jaigunean ehunka lagunek. "Jehovaren eta Marijaiaren baimenarekin" egin dute protesta, eta, deialdian, herritar guztiei egin diete dei parte hartzera: "Apostolikoei, erromanikoei, erromantikoei eta egiazkoei".
