Zer eskatuko zenioke hurrengo lehendakariari?

Galdera hori paratu die Berria.info gunean Euskal Herriko hainbat gizarte eragileri, eta egunero bat ari da erantzuten webgunean, bideoz. Mikel Irizar Topagunea Euskara Elkarteen Federazioko lehendakariak «lankidetzarako jarrera» eskatu dio hurrengo Jaurlaritzari. «Euskalgintzan badago kezka, gogoetarako joera eta ilusioa». Herri ekimenak eta erakundeen ahalmena uztartzearen alde egin du. «Lehendakariari eskatuko nioke ez dezala berak esan hainbeste zer egin behar den, baizik eta ari garenokin lankidetzan aritu dadila». Bilgune Feministatik, Saioa Iraolak «aldaketa erradikala» egiteko eskatu dio, andreen zapalkuntzari aurre egiteko. Gauzak aldatzeko «borondate politikoa» ere galdegin dio.