Bilboko Ametzola plazan egin dute zezenketen aurkako elkarretaratzea, zezen plazaren alboan, 17:00etan. Zezenketetara zihoazenei txistu egin eta "hemen torturatzen da" oihukatu diete protestan ari zirenek, eta irainka erantzun dute zezenketen zale batzuek.
Ertzaintza eta Bilboko Udaltzaingoa bertara joan dira, bi aldeak banatzeko. Bizkaiko Kolektibo Antitaurino eta Animalistak deitu du protestara, eta elkarretaratzearen ondoren manifestazioa egin dute Moiua plazarantz. Bertan, omenaldia egin diete Bilboko Aste Nagusiko zezenketetan hildako 54 zezenei.
