Animalien eskubideen aldeko sentsibilizazioa areagotu egin dela uste du Askekintza elkarteak, eta, hala, Donostia zezenketarik gabeko hiri bilakatzea galdegin du. Horretarako, gaiari lotutako herri mailako galdeketa bat eskatu dute, bete beharrekoa, "donostiarren nahia behingoz errespeta dadin". Gailu enpresak egindako inkestaren arabera gipuzkoarren %72 zezenketen kontra daudela azaldu du elkarteko bozeramaileak.
Zezen eta zekorren heriotza edo sufrimendua bere gain daramaten ikuskizunak salbuespenik gabe debekatzeko eskatzeko, ekintza berezi bat egin dute Bilbo plazan: eguerdiko kanpaiekin batera, kideetako batek iturriko ura gorriz tindatu du, eta, hala, zezenketetan isurtzen den odola gogorarazi. Plazako iturrriaren inguruan jarri dira elkarteko kideak, gorriz margotutako eskuak erakutsiz.
