Gaur asteartean heldu da albistea: Ziburuko Santa Teresa inguruan eraikitzekoak ziren 455 etxebizitzako proiektua bertan behera utzi du Paueko Auzitegi Administratiboak. Hain zuzen ere, Zaindu Santa Teresa elkarteak jarritako helegitea aintzat hartu du auzitegiak, eta 2014ko otsailean eta 2015eko apirilean auzo berria eraikitzeko baimenak baliogabetu ditu. Hala, Ziburuko herriko etxeak 1.000 euro itzuli beharko dizkie helegitea jarri zuen herri elkarteari.
Olhetarako errepide ondoan hastekoak ziren eraikuntza lanak eten beharko dituzte, beraz, ebazpenaren ondorioz. Herriko etxeak aukera du helegitea jartzeko.
