Eskubideak izeneko abokatuen elkarteak Arantza Zuluetaren aurreko asteko atxiloketa zentzurik gabekoa dela adierazi du. Iñigo Sancho eta Alfonso Zenon abokatuek hartu dute hitza gaur goizean egin duten agerraldian, eta salatu dute lehengo akusazio berarekin berriro atxilotzeak ez duela juridikoki oinarririk.
Libre baldintzapean geratu zenetik, Zuluetak baldintza guztiak bete dituela eta ihes egiteko arriskurik ez dagoela nabarmendu dute abokatuek. ETAko kide izatea leporatzen diote Zuluetari. Ustez lehenengo atxiloketan atzeman zioten pen-drive batean aurreko astean Baigorrin agertu ziren zuloen planoak aurkitu zituztelako atxilotu dute berriro.
Grande-Marlaskaren obsesioa
Fernando Grande-Marlaska epaileak nolabaiteko obsesioa duela Zuluetarekin esan dute Eskubideak elkartekoek. Horregatik helegitea berari aurkeztu beharrean, libre baldintzapean utzi zuen aretoan aurkeztuko dutela azaldu dute, Auzitegi Nazionaleko Hirugarren aretoan. Gaur bertan egingo dute.
Gainera, prozesua hasi zenetik irregulartasunak egon direla gaineratu dute.
