Hurbil, eta indartsu

Frantzian hegazti gripearen H5N1 birusarekin kutsatutako beste hegazti bat agertu dela baieztatu zuten atzo, bigarrena. Igandean Ain departamenduan hilda agertutako basahate bati probak egin dizkiote, eta positibo eman du. Eta ez da hori guztia. Indioilarrak hazten dituen etxalde batean kutsatutako hegaztiak dauden susmoa ere azaldu zuten atzo agintariek. Gaur baieztatuko dute hegaztien artean H5N1 birusa zabaldu den. Baina susmo txarrak dituzte. «Ia segurua da», eman zuen aditzera atzo Frantziako Nekazaritza Ministerioko bozeramaile batek.Atzo goizean larritu ziren etxaldean. Hilda aurkitu zituzten indioilar asko, eta kezkatzen hasi ziren arduradunak. Frantzian orain arte gaitzak kutsatuta agertu diren bi hegaztiak, eta susmagarritzat duten etxaldea, hirurak, Ain departamenduan daude, Frantziako ekialdean. Izurria saiheste aldera, bakartu egin dute ustez kutsatutako etxaldea, eta hegaztiak akabatu egingo dituzte. «Eta etxaldeko jabeak dagozkion kalte-ordainak jasoko ditu», jakinarazi zuten atzo Frantziako Nekazaritza Ministerioko arduradunek.Kasu hau baieztatzen bada, Europako Batasunean etxaldeetan gordetako hegaztietan birusa agertzen den bigarren kasua izango da. Asteazkenean Austrian hegazti erreserba batean kutsatutako hegaztien berri eman zuten.Gaitza Europa osoan zabaltzen ari da. Grezian H5N1 birusarekin kutsatutako beste zazpi beltxarga basati agertu direla jakinarazi zuten atzo, eta Alemanian, Mendebaldeko Pomeranian, arduratuta, 50 oilo akabatu zituzten etxalde batean, H5N1 birusak kutsatuta zeudela pentsatzen baitzuten. Analisiek, aurrerago, ezeztatu egin zituzten etxalde kutsatuko susmoak, baina kezka handia zabaldu zen.

30 estaturen bilera

Gaur, Europako Batasuneko 25 estatuetako Osasun ministroek bilera egingo dute Errumania, Bulgaria, Turkia, Kroazia eta Mazedoniakoekin batera. Ezohiko batzarra izango da, propio hegazti gripearen bilakaera aztertzeko. Bileran Osasunaren Mundu Erakundeko (OME) kideek ere parte hartuko dute, beste hainbat aditurekin batera.

Indian ere bizkor zabaltzen ari da eritasuna. Osasun agintariek, arduratuta, Navapur hiria Ðmendebaldean dagoÐ eta inguruko hainbat herri bakartzea erabaki zuten atzo. 200.000 hegazti akabatu dituzte, eta 3,5 milioi arrautza erretiratu dituzte merkatutik. Hala ere, gaitza pertsonengana iritsi den susmoa dute.

NEURRIAK

 

Espainiako Gobernuak deitutako bileran hegaztiak etxaldeetan ez ixtea erabaki dute

Atzo bilera egin zuten Espainiako Nekazaritza Ministerioko arduradunek autonomia erkidegoetako arduradunekin. Elkarrekin gaitzari aurre egiteko neurriak eztabaidatzen aritu ziren, eta, oraingoz, hegaztiak ixteko agindurik ez ematea erabaki zuten. Madrilgo autonomia izan zen erabaki horren aurrean uzkur agertu zen bakarra, eta beren kabuz, hegaztiak aire librean haztea galaraztea erabaki dute bertako agintariek.

Gainerakoan, bileran parte hartu zuten agintariek, hartu beharreko neurriak taxuz hartu direla esan zuten, eta nekez konpon daitekeela deus hegaztiak etxaldeetan itxita. Nolanahi ere, etorkizunean erabaki ezinbestekoa gertatzen bada, badaezpada ere, plan bat pentsatzea erabaki zuten, kasu horretan egin beharreko urratsak behar bezala egiteko.Nekazaritza Ministerioak, halaber, autonomia erkidegoen esku utzi du babes berezia behar duten lekuak zerrendatzeko aukera. Lehendik ere izan zuten autonomia erkidegoek gaitzaren inguruan babes handien behar duten padura eta natur guneak zerrendatzeko aukera Ð25 aipatu zituzten deneraÐ, eta, orain, gaitza zabaltzen ari dela eta, zerrenda horiek berriro osatzeko aukera emango zaie. Gaur arteko epea jarri zien atzo Ministerioak egiteko horretarako. Leku horietan ezarri nahi diren babes neurriak moldatzeko aukera izango dute autonomia erkidegoek, toki bakoitzeko beharretara egokitzeko.Hegazti gripearen inguruan zabaldu diren lasaitasun mezuak ondo iritsi eta ulertu direla esan zuten, eta hegazti haragiaren kontsumoa ez dela asko jaitsi. Iaz garai honetan saltzen ari ziren baino %6 gutxiago saltzen ari dira, Europako beste leku askotan baino dezente gehiago.