Bazterketarik gabe

E lkarrizketa garaia da, eta elkarrizketak bazterketarik gabe izan behar du. Printzipio hori onartu beharra dago elkarrizketa eraginkorra izatea nahi izanez gero. Beraz, argi dago Eusko Legebiltzarraren gehiengoak —EAJ, PSE, PP, Ezker Anitza eta Aralarreko hiru legebiltzarkideren sostenguz— onartu duen lantaldea herren jaio dela. Hasierako proposamenean, zehazki aipatzen zen «inolako bazterketarik gabe» esapidea desagertu egin da azkenean onartutako testu laburrean. Eusko Legebiltzarraren akordioaren hutsuneaz ohartzeko, Gipuzkoako Batzar Nagusiek onartutakoa begiratu besterik ez dago. Bilduk, EAJk, PSEk eta Aralarrek babestutako mozioan, «bazterketarik gabeko elkarrizketa» erreibindikatu egin dute. Printzipio horri amore ematea elkarrizketa alboratu edo atzeratu nahi dutenei bidea erraztea da. Elkarrizketarako espazioak behar dira, baina horien kudeaketa ezin da interes alderdikoi edo pertsonalen itzalpean utzi. Ikusteko dago noraino iristen den «elkarbizitzarako lantaldea», ahituta dirudien parlamentu batean.