Herri baten zerbitzura

Mossos d'Esquadra polizia taldea «estatu egitura bat» dela esan berri du Felip Puig Kataluniako Barne kontseilariak, eta «aldaketa esanguratsuak gertatzen diren unean» herriari segurtasuna ematen diola. Kataluniak zer bide hartuko duen eta erabakitzeko eskubidea nola gauzatuko duen ikuskizun dagoelarik, zenbaitzuek «legezkotasun demokratikoari legezkotasun juridikoarekin» aurre egiteko arriskua ikusten du Puigek. Eta, hala gertatuko balitz, ziurtzat jo du mossoak «herriaren eta bere erakundeen zerbitzura» egongo direla, mossoen beren kongresu batean. Puigek aipatutako estatua eta herria, bistan denez, Katalunia dira, ez Espainia; eta herriaren erakundea, Generalitatea.

Rodolfo Aresek Ertzaintzari buruz halako zerbait esatea ameskeria litzateke. Baina Guardia Zibilak Egunkaria itxi zuenean, Javier Balza zen Herrizaingo sailburua. Eta, atxiloaldiko amesgaiztotik irtetean, Martxelo Otamendik galdetu zuen otsailaren 20an Ertzaintzak ez ote zukeen Martin Ugalde Parkean egon behar, itxiera eragozteko.