Naledi

Jakin nuenean zazpi mila urte izan ordez, nire hezurdura euskaldunak bost mila zituela gehienez, hondoa jota gelditu nintzen. Bost mila besterik ez! Depresioaren sorgin laratzak eramango ninduen infernuaren ipurdiraino ere, baldin handik egun batzuetara iragarri ez balute naledi gizakia deskubritu izana. Naledi bat gizakiaren sorreran! Naiz eta ledi, indikatiboa eta ahalera elkarrekin dantzan. Abildade kontzeptuala behar da aditzaren bi era uztarturik, gizakiaren errealitatea eta unean uneko kontingentzia (na edo naiz) eta letorkeenari buruzko proiektua, desioa, etorkizuna eta gizakiaren garapena (ledi)adizki bakar batekin adierazteko. Eta nola adieraziko gizakiaren hastapenak, eta euskararen bidetik: naizena, ledi!

Naledi hura gizakia ote zen jakiteko, Yuval Noah Harari adituak esan du irudimena ote zuen ikustea dela garrantzitsua. Bi mila urte kendu zizkiguten? Irudimen pixka batekin gizakiaren sehaskaraino garamatza euskarak.