Yo-yo

Lagunak sekula pentsatuko gertatuko zitzaionik: Raxoi txalotzen harrapatu zuen bere burua. Penitentzian, inoizko erabaki latzenari ekin dio: Rosa Díez Turismoko kontseilari izan zeneko aholkua (Ven y cuéntalo, zatoz eta konta ezazu) betetzen hasi da fortunatzen zaizkion abagune guztietan:

—Telebistaren aurrean hasi zuan dena, egunak emandako albisteen murmuan nengoela. «Denok oso txarrak ematen dugu, baina eskerrak zu zauzkagun!». Ipurdia asunarekin igurtzi balidate bezala suspertu eta txaloka hasi ninduan gailegoari. Irudietan, behingoagatik jokoz kanpo, Rosa Díez, ni esaten duen aldiro, kapelua kentzen duen eta kalparra harrotzen zaion emakumea. Bi begietako nini biak bixitzen zaizkiona kamerak hurbil sumatu orduko. Bere buruarekin nitanoz eta berorika mintzatuko litzatekeena, baldin euskara gorrotatuko ez balu eta berorika baleki.

Lagunak beti eskertuko omen dio Raxoiri gau hartan hain sakon zabal lo egin izana.