Joan-etorriko paperak

Ramon Agirre

Honako hauek nire burutazioak dira, Madrilen 'La Casa de Papel' telesailean (LCDP) ari naizen bitartean koaderno txikian, gidoiaren atzealdean edo tabernako serbiletan jasotakoak.

Ramon Agirreren kontakizuna

130

Amaitu dira LCDP-en grabaketak. Olatuaren aparrean dagoen aktoreak gidoi mordoxka edukitzen du mesanotxean. Nik ere iratzargailua lurrean ipini behar izan dut telebista eta zinema gidoiei leku egiteko: XIX. mendean girotutako biopic bat, Kuban egingo den komedia bat, nazioarteko thiller bat ingelesez errodatzekoa, distopia bat plataforma handi batentzat… Denak irakurri behar al ditut? Hau lana…!

129

Ingelesez besteko film onenaren Oscar saria jaso du Thomas Vinterberg daniarraren Druk ederrak (Espainian Otra ronda). Zuzendariak esan du: «Nire filmak, zenbat eta gertuago nigandik eta nire ingurumaritik, orduan eta unibertsalago gertatzen dira».

128

Bada oraindik LCDP behin betiko amaituko denik sinistu ezinda dagoen jendea. «Lapurreta bati bi mila minutu fikzio eskaintzea nahikoa dela uste dut», esan du Alex Pinak, telesailaren sortzaileak.

127

Nik ez dakit kroazieraz, baina ahotsaren tonuagatik badakit zer esaten ari zaion Luka telefonoz bestaldekoari: «Potrotaraino nagok, goizeko zazpietan ekarri naitek eta oraindik ez diat plano bakar bat ere egin», eta «Azkeneko figurantea banintz bezala tratatzen naitek hemen. Ni izar bat nauk nire herrian, adittu!?», eta «¡¡Uvreda ismijavanje podrujivanje!!» edo antzeko zeozer.

126

Bazen behin talentu handiko gidoigile bat gazteleraz idazten zuena. Euskaraz ez zekien aktore bikain batekin elkartu zen, eta umorezko telesail bat sortzea erabaki zuten. Pertsonaiak euskal kutsu handiko espainolez mintzatuko ziren, tarteka euskal hitzen bat sartuz, txoko, el baserri, kabenzotz, mis áitas, pintxo… Gidoiaren ezinbesteko osagai izango ziren, txapela, kupela, kaxuela, txitxarroa ta berdela, eta Joxemielen batela. Telesailak (edo filma zen?) arrakasta handia izan zuen. Tira, beti egoten da bere buruaz barre egiten ez dakien euskaldun buruestu, erretxin, umorebakoren bat…