110 metro hesidunak interesgune nagusia Londresko proban

Gaur eta bihar Londresko proba jokatuko da, Diamantezko Ligako 12. proba da, eta bi egunez jokatzen den bakarra. Usain Boltek 200 metroetan korrituko du bihar, eta Asafa Powellek 100 metroetan gaur. Munduko atleta bizkorrenen arteko duelurik gabe, 110 metro hesidunetako probak sortu du ikusmin handiena. Dayron Robles munduko markaren jabe, eta olinpiar txapeldun kubatarra David Oliver munduko txapeldun estatubatuarrarekin lehiatuko baita. Biak dira aurten Hego Korean munduko txapeldun izateko hautagai nagusiak, eta biak jaitsiak dira 13 segundotik. Hori bai, aurtengo marka Oliver gihartsuak du (12,94).