Azken orduko ezuste handirik ezean, beste denboraldi batez ACB ligan ariko da Lagun Aro Gipuzkoa Basket. Denboraldi kaskarra eginda, maila galdu zuen kantxan, baina, diru arazoak tarteko, LEB ligako bi taldeek —Alacantek eta Burgosek— uko egin behar izan zioten ACBn jokatzeari. Eta ACBk gaur goizean jakinarazi dio Lagun Arori maila gorenean jarraitzeko baldintza guztiak betetzen dituela. Saskibaloi Kluben Elkarteak bihar egingo du batzarra, eta bertan berretsi beharko du Lagun Aro ACB ligako taldea dela. Alvaro Bilbao presidenteak azaldu du "klubarentzat eta zaleentzat albiste bikaina" dela. "Lan onari, kudeaketa ordenatuari eta zintzotasun ekonomikoari esker lortu dugu hau".
Krisi garaiotan, erronka zaila izango da ACBn jokatzea. "Baina bazkideei eta zaleei itzuli egin nahi diegu denboraldirik gogorrenean eman ziguten babesa. Horregatik, maila gorenean ahalik eta ilusiorik handieneko proiektua eskaintzen saiatuko gara".
