Alaves Espainiako Kopatik kanpo geratu da

Ustekabeko handia da, Jaen Alaves baino hiru maila beherago ari baita, eta Asier Garitanok hamaikako lehiakorra zelairatu baitu. Baina alferrik. Partida hasi eta gutxira maldan gora jarri zaio lehia, etxekoek gola sartu baitute: Ocañak, hamalaugarren minutuan. Premiak behartuta, Alavesek gora egin du, eta neurketaren kontrola hartu, baina erasoan apenas sortzen duen arriskurik. Partida nahiko maldan gora ez bazegoen, are eta gorago jarri zaio bigarren zatia hasi eta gutxira, epaileak txartel gorria atera baitio Laguardiari, erdiko atzelariak sarrera gogor bat egin ondoren. Nola edo hala eutsi diote gasteiztarrek, baina, 84. minutuan, Miguel Martinek bigarren gola sartu du. Handik bi minutura, Pere Ponsek 2-1ekoa lortu du, eta bisitariei esperantza bueltatu die. Baina, 90. minutuan, Franek errematea eman die, hirugarren gola sartuta.