Neurketa hasi eta gutxira, izan duen lehen aukeran gola egin du Vila-realek. Gerard Morenok aurretik jarri du kanpoko taldea, 10. minutuan, eta 0-1ekoarekin iritsi da partida atsedenaldira. Ordura arte, ez da gol aukera askorik izan. Alavesek izan du berdintzeko aukera, ordea, korner bateko erdiraketaren ostean Vila-realen arean izan den nahastean.
Bigarren zatian, berdinketaren bila irten da Alaves. 48. minutuan, Sobrinok ate aurrean huts egin du, ia egina zuen gola. Baina handik bi minutura Callerik egin du banakoa. Ibai Gomezek erdiraketa ona egin du eta aurrelariak sareetara bidali du errematea.
Golaren ondoren, jokoan nagusitu zaio Alaves aurkariari, eta markagailuan aurretik jartzeko aukera bikaina izan du Callerik 63. minutuan. Kontraeraso jokaldi batean, Sobrinok atezainaren aurrean utzi du Calleri, baina aurrelariak atearen gainetik bidali du jaurtiketa.
Partidaren azken minutuetan estu hartu du Alavesek Vila-real, eta partida irabazi zezakeela agerian utzi du. Abelardok Borja Baston zelairatu du Ibai Gomezen ordez, 93. minutuan, eta Bastonek egin du garaipenaren gola egin duen lehen jokaldian.
Beste garaipen bat lortu du Alavesek, eta bigarren da sailkapenean, Bartzelonak dituenak baino puntu bakar bat gutxiagorekin.
