Aldaketa batzuk eginda joan da Baiona Toulonera

Baionak etxetik kanpo jokatuko du berriro ere. Joan zen astean Mont de Marsanen irabazi ondoren, sailkapeneko behealdean dagoen taldearen etxera, Toulonera, joango da Lapurdiko taldea. Heineken Kopan sartzeko, etxean jokatuko dituen partida guztiak irabaztea oso garrantzitsua da, eta hori buruan duela joan da Mediterraneo aldera Baiona.

Joan zen astean jokatu zuen hamabostekoan aldaketa batzuk egitea erabaki du Richard Dourthe Baionako kirol zuzendariak. Hurrengo partidetan konponbide gehiago izan ditzakeen ikusi nahi du horrela Dourthek. Adibidez, orain bi aste Springgay bigarren lerro ingelesak oso sartze ona egin zuen Perpinyaren aurka, eta entseguan bikain jokatu zuelako irabazi egin zuten. Azkenaldian, Tewhata ikusgarri ari da, eta Springgay hasieratik zelairatuz lehia sortu nahi du Dourthek bigarren lerroan.

Hamargarren postuan, duela bi aste Baionara etorri zen Strydom hegoafrikarrak ere lehen aukera izanen du. Bere ostikadarentzat ekarri dute Euskal Herrira Strydom, eta gaur hasieratik arituz, bere zangoa epaitzen ahalko du Dourthek. Lehen lerroan ere, Fiorini hasieratik ariko da. Iaz titularra zen, eta aurten aukera gutxi izan ditu. Urte bukaerarako esku kolpe bat edo beste eman ditzakeen edo ez ikusiko du Dourthek gaur arratsaldean.

Toulon eta irletako jokalariak

Baionak gaurko partida irabaz dezake, egindako aldaketak eginda ere. Horretarako, Toulonen gibeleko lerroa bereziki zaindu beharko du. Tana Umaga All black ohi eta Touloneko entrenatzaileak erakarrita, hego hemosferioko irletako jokalari anitz etorri dira: Williams, Ai´I, Sinoti, Rooney eta Lovobalavu. Oso biziak dira, eta bereziki arriskutsuak izanen dira bat-bateko jokaldietan. Garaipena hurbil izango du Baionak arrisku hori ondo zainduz gero.



TOULON- BAIONA

Toulon. Auelua, Basterets, Fitzgerald, Kovamaibole, Kubriashvili, Labadze, Maestri, Ribes, Skeate, Sourice, Suta, Taumoepeau, Van Niekerk (kap.), Ai´I, Andreu, Barnard, Fauque, Henjak, Jagr, Jordaan, Lovobalavu, Mariner, Pisi, Rooney, Sinoti, Williams.

Baiona. Fiorini, Roumieu, Blake; Linde, Springgay; Deen, Martin (kap.), Bernad; Garcia, Strydom; Peyras, Gower, Lacroix, Fall; Elhorga. Ordezkoak. Iginiz, Hegi, Avril, Tewhata, Baget, Puricelli, Tilloles, Edmonds, Gerber.

Epailea. Jean Pierre Matheu.

Zelaia. Toulongo Mayol.

Orena. 20:30ean.