ALEMANIAKO RALLYA. Loeb jaun eta jabe, eta Panizzi etxera bidean

Sebastien Loeb Citroen etxeko gidariak Alemaniako Rallyko sailkapen nagusiko buru jarraitzen du, bigarren etaparen ondoren. Carlos Sainz taldekideak, baina, François Duvalen faboretan galdu du bigarren postua. Duvalek 54 segundoko atzerapena du Loeb herrikidearen aldean, eta Sainzi sei segundo eskas kentzen dizkio. Atzoko jardunaldian hainbat istripu izan ziren, denetan larriena Gilles Panizzi Mitsubishi etxeko gidariarena. Errepidetik irten zen lehen luzean, eta autoak bere aldean hartu zuen kolpe handiena. Hasieran besoa hautsita zuela uste bazuten ere, ospitalean ondo dagoela ziurtatu zuten. Herve anaia zuen kopilotu, eta hark ez zuen minik hartu. Istripuez gain, Freddy Loixenak bezalako salto ederrak ere utzi zituen atzoko jardunaldiak. Hermann J. Knippertz / efe