Anaitasunak lasaitasuna du jokoan gaur, Naturhousen aurka

Anaitasunak lasaitasuna du gaur jokoan Arrosadia pabiloian, Logroñoko Naturhouse taldearen aurka (12:30). Iruñeko taldeko jokalari asko min hartuta daude, baina hutsune horiei aurre egin beharko die jaisteko postuetara gehiegi ez gerturatzeko. Egun hamabigarren dago sailkapenean, eta bi punturen aldea baino ez dio kentzen jaisteko postuetan dagoen lehen taldeari. Horiek hala, puntu bat behar du gutxienez hurrengo jardunaldietan huts egiteko eskubidea izaten jarraitzeko.

Anaitasunak ez du ondo hasi bigarren itzulia, eta, liga hasieran gertatu bezala, lehen partida irabaztea kostatzen ari zaio. Orain arte egoera ez zen hain larria, baina Huescak atzo irabazi izanak asko estutu du Asobal ligako jaisteko postuetatik ihes egiteko lehia. Bide horretan pauso bat emateko aukera du Aitor Etxaburuk zuzentzen duen taldeak, baina entrenatzaileak buruhauste asko izango ditu, lesioen erruz. Miguel Goñik zuntz haustura egin zuen atzo izterraren atzealdean, eta Canciok eta Lopezek min hartuta jarraitzen dute. Etxaburuk azken unera arte ezingo du deialdia osatu, Garcia Potxolo eta Txokarroren parte hartzea kolokan dagoelako. Aurkariari dagokionez, zortzigarren sailkatua da, eta hark ere ez du partidarik irabazi bigarren itzulian.

Kukullagaren aurrerapausoa

Kukullagak ligako partida garrantzitsuena izan daitekeena irabazi zuen atzo Castroren pistan (18-19). Aurkaria aurretik zuten taldea zen, jaisteko postuetatik kanpo dagoen aurrenekoa, eta orain puntu baten aldea baino ez dago bien artean. ABF ligan ustekabekoak ematea oso zaila da, eta Kukullagak galdu izan balu, ia ezinezkoa zatekeen mailari eustea. Atzokoa taldeak denboraldian irabazitako hirugarren partida izan zen, etxetik kanpoko lehena, eta orain sei jardunaldi ditu Castro pasatzeko. Bera Berak ere egun gozoa izan zuen, 21-32 irabazi baitzuen Porriñoren pistan. Garaipenari esker bigarren postuan jarraitzen du eta bi punturen aldea ateratzen dio Sagunti.