Anitz balio duen puntua

Montpellier. Figallo (Leleila, 68. min.), Creevy (Van Vuuren, 68. min.), Jgenti (Bustos, 68. min.); Hancke, Privat (Marco, 59. min.); Ouedraogo (kap.) (Martin, 40. min.), Tulou, Gorgodze; Tomas, Trinh-Duc; Moyano, Fernandez, Doumayrou (Combezou, 64. min.), Nagusa; Amorosino.

Miarritze. Barcella (Watremez, 40. min.), August (Hegi, 46. min.), Kodela (Van Staden, 40. min.); Thion (kap.), Taele (E. Lund, 75. min.); Lauret, Lakafia, Gray (Guyot, 63. min.); Lesgourgues, Peyrelongue; Baby (Baraque, 26. min.), Traille, Gimenez, Ngwenya; Bosch.

Markagailua. 5-0; 5-3; 8-3; 11-3; 14-3 (atsed.) 14-6; 21-6; 21-13; 21-16.

Porrot guztiak ez dira txarrak izaten. Batzuetan, irabazleak eta galtzaileak gustura itzultzen dira aldageletara. Atzo, Montpellierrek helburua bete zuen Miarritzeri irabaziz, baina Miarritze ere gustura zegoen eskuratutako defentsa puntuarekin. Etxekoek final-laurdenak jokatzeko txartela sakelean dute %99-an, eta Miarritzek kopuru berdinean du ziurtatuta Top14ean jarraitzea.

Defentsako puntua baino gehiago ezin izan zuen lortu Agilerako taldeak, baina gauzak nola hasi ziren ikusiz, gustura egoteko modukoa da. Lehen zatia bukatzean beranta handia zuen: 14-3. Partidako lehen jokaldian, gainera, entsegu bat jaso zuten. Hasiera kaxkar horren ondotik Miarritze burua altxatzen entseatu zen, eta Babyk 5-3joa jarri zuen.

Lehen zatiko uztartzeetan oso ahul aritu zen Miarritze. Barcella eta Kodela irentsiak izan ziren, eta uztartze bakoitza Montpellierren erakustaldi bilakatu zen. Epaileak lau zigor kolpe eman zizkion Montpellierreko uztartzeari eta 14-3 iritsi zen aurretik etxeko taldea atsedenaldira.

Bigarren zatia ere gaizki hasi zen, Doumayrouk sekulako entsegua sartu baitzuen: 21-6. Baina Ngwenyak berehala ihardetsi zion, beste batekin: 21-13. Miarritzek lehen lerroa aldatu zuen, eta gaina hartu zuen uztartzean. Zigor kolpeak bere alde izan ziren, aldi horretan. Barraquen ostikada bati esker defentsako puntua eskuratu zuen partida bukaeran.