Aperribai «baikor» agertu da Velaren fitxaketaren inguruan

Jokin Aperribai Realeko presidentea baikor dago Arsenaleko Carlos Vela fitxatzeko aukerari dagokionez. Azken egunetan «aldaketa gutxi» izan dela azaldu duen arren, orain bi aste baino «aukera gehiago» ikusten du. Hala ere, kontuz aritu nahi du, negoziazioa «edozein unetan» hauts daitekeelako. Presidentearen esanetan, bai Arsenalekin eta bai Velarekin akordioa lortu beharra dauka Realak oraindik. Horregatik, negoziazioa amaitzeko «pauso bat baino gehiago» falta dela adierazi du. «Ziur» dago mexikarrak talde txuri-urdinean jokatu nahi duela, baina hori ez da erabakigarria: «Nahi dena lortzea ez da beti posible». Velaz gain, ez du beste inor fitxatzeko asmorik.