Armstrongek lidergoa eta etapa lortu ditu; Mayo etxera joan da

Lance Armstrong U.S. Postaleko buruak bigarrenez lortu du elastiko horia janztea aurten. Pirineotan Voecklerrek zuen tartean murriztu ondoren, gaurkoan ihesi joan den talde batean sartu eta denbora tarte handia atera dio Lance Armstrongek gaur arte liderra zen Voecklerri.

Etapa nahasia izan da gaurkoa, eraso anitzekoa. Ihesaldiak ere egon dira, haietako batzuk nahiko luzeak, baina lehenengo mailako Col de l'Echarasson igaro ondoren ihesalariak harrapatzera abiatu da Lance Armstrong. Horretarako,tropeletik alde egin duen txirrindulari talde batean sartu da Armstrong, bere taldekide batzuekin. Azkenean, Col de Chalimont bigarren mailako mendatearen inguruan, ihesean zebiltzan guztiak harrapatu ditu Armstrongen taldeak.

Gaurko etapan igo duten azken aldapak 2,3 kilometro eta %5,7ko malda du. Azkeneko malda horretan talde burua zatitu da eta azkeneko 500 metrotan bost txirrindularik elkarrekin jarraitzen zuten, buruan: Lance Armstrong, Ivan Basso, Jan Ullrich, Andreas Kloden eta Levi Leipheimer.

Boskoteak azkeneko metroetan inposatutako erritmoa oso bizia izan arren, inor ez da atzean geratu eta amaiera esprintean jokatu dute. Esprinta oso indartsu jo du Lance Armstrongek eta etapa irabazi. Haren atzetik Ivan Basso sartu da eta hirugarren postua Jan Ullrichek lortu du.

Mayok Tourra utzi du

Iban Mayo ez da abiatu gaurko etapan. Euskaltel-Euskadiko txirrindulariak izugarrizko egurra hartu zuen Pirinioetan, eta Alpeetan ez abiatzea erabaki du. Mayok birusen bat izan dezakeela uste dute Euskaltel-Euskadikoek, eta azterketak egingo dizkiote.