Arratek 28na berdindu du Toledon, eta jaitsieratik kanpo jarraitzen du

Arratek mailari eusteko pauso garrantzitsua eman zuen atzo Toledon. Ligako partida garrantzitsuena zen Eibarko taldearentzat, mailari eusteko aurkari zuzenaren etxean, eta berdinketa baliotsua lortu zuen (28-28). Arratehamalaugarrena da sailkapenean, eta Toledorekiko, jaitsiera postuetan dagoen lehen taldearekiko bi puntuko aldearekin kantxaratu zen atzo. Berdinketari esker, baina, bi taldeen arteko gol aldea ere eibartarren mesedekoa da orain, lehen itzuliko partidan 28-27 irabazi zutelako. Beraz, aldea hiru puntukoa dela esan daiteke, partida bat baino gehiago.

Arratek arnas pixka bat hartu zuen, baina ondo sufrituta. Toledok bazekien partida garrantzitsua zela, eta pabilioia infernu bilakatu zuen.Bi taldeek, era berean, ez zieten zaleei lasaitzen utzi, partida estua izan zelako hasieratik. Horren adibide etxekoak atsedenaldian zuten alde txikia (12-13). Halere, Arratek hobeto ekin zion bigarren zatiari eta hiru goleko errenta lortu zuen (17-20, 41. min.). Une horietan Kurilenko agertu zen, zortzi golekin bera izan zen eibartarren jokalari onena. Toledo berriz jarri zen aurretik (22-21), baina Arratek garaipena eskura izan zuen Kurilenko eta Alzagari esker (27-28). Eibartarrek jokalari bat gutxiagorekin amaitu zuten partida, eta berdinketa ontzat emanez.

Itxako, ia txapeldun

ABFko bi euskal taldeek 21. jardunaldiko euren partidak irabazi zituzten atzo, eta Bera Berak mesede handia egin zion Itxakori. Donostiako taldeak 27-23 irabazi zion Elda bigarren sailkatuari, eta Itxakok Murtzian 24-31 irabazi zuenez orain lau garaipeneko aldea du bigarren sailkatuarekiko. Liga bukatzeko bost jardunaldi falta direnez, Itxakok hurrengo astean lortu dezake titulua, etxean Cleba Leoni irabazten badio. Orain, Bera Bera da ligako helburua alda dezakeena, Eldarekiko bi garaipenera dago eta txapeldunorde izan daiteke. Dena den, hurrengo astean Elxen irabazten badu matematikoki ziurtatuko du Europarako txartela.