ARRAUNA. KONTXAKO BANDERA. Zumaiak ezustekoa eman du, eta onenen artean egongo da

Emakumezkoen Kontxako Banderaren lehen aldian, iaz, Galizia, Astillero, Getaria-Zumaia eta Hondarribia lehiatu ziren. Atzo, berriz, sailkatze estropada jokatu baino lehenago, asko ziren final bera errepikatu zela pentsatzen zutenak. Egia esan, uste hori zutenak ez ziren pronostikoetan urruti-urruti ibili, baina ZumaiakHondarribiari aurrea hartu zion, eta ezustekoa eman. Beraz, gaur, finalean, Galiziak sailkatze estropadako garaileak, Getaria-Tolosa bigarrenak, Astillero hirugarrenak eta Zumaiak neurtuko dituzte indarrak (11:00, ETB 1).

Faborito argi-argirik ez dago, baina, atzo, Galizia iazko irabazlea eta Getaria-Tolosa nabarmendu ziren; sasoi honetako onenak, alegia. 40 ehuneneko aldea bakarrik egon zen bi traineruen artean. Hirugarren txandan arraun egin zuen Galiziak, Astillero, Hondarribia eta Artabriarekin batera. Hasieratik hartu zuen aurrea, eta ziabogan bera onena; baita helmugako balizetan ere. Astillerok, ordea, bost segundo baino ez zituen galdu.

Bigarren txandan, sailkatutako beste bi ontziak aritu ziren, Mecos Galiziakoa eta Club Natacio Badalonako traineruekin batera. Getaria-Tolosa zen faborito argia-argia, baina Zumaia ez zen, ez, berehalakoan atzean gelditu; ez zen kikildu. Ziabogan segundo bakarra galdu zuen, eta, sailkatzeko aukera argiak zituela ikusita, itzulerako luze bikaina egin zuen. Azken asteotan beste traineru batekin ari da lanean, gizonezkoen koadrilaren bigarren ontziarekin, eta onerako nabaritu zuten atzo. Ezustekoa eman zuen, eta Hondarribia finaletik kanpo utzi.

Sailkatze estropada

1. Galizia 11.03,68

2. Getaria-Tolosa11.04,08

3. Astillero 11.09,32

4. Zumaia 11.09,62

5. Hondarribia 11.15,76

6. Bizkaia 11.22,88

7. Mecos 11.54,86

8. Artabria 11.55,88

9. Club Natacio Badalona 12.07,64

10. Ur Kirolak 12.22,24

11. Club de Rem Badalona 13.05,46