Taldeak maila galdu eta kluba alde guztietatik lehertu. Biak bat izan dira Osasunan. Bi aste eskas joan dira taldea Bigarren Mailara jaitsi zenetik, nahikoa klubaren miseria guztiak azalera daitezen. Egoerak gainezka egin du, Miguel Artxanko presidentea, klubaren arduradun nagusia aurretik eramateraino.
Artxankok gaur arratsaldean eman du dimisioa. Artxankok berak Sadarren deitutako zuzendaritzaren ezohiko bilera batean eman du bere erabakiaren berri. Beraz, ez da ezohiko batzarrik egingo ekainaren 16an. Lau egun geroago egingo dute, eta egun horretan deituko dituzte lehendakaritzarako hauteskundeak.
Dimisioa emanda, amaitu da Artxankoren aroa. Laburra izan da. Bi urte eskas iraun du presidente karguan—2012ko uztailaren 1ean iritsi zen kargura, Patxi Izko ordezkatuz, eta Javier Zabaletari hauteskundeetan irabazita—.
