Espainiako Ligako 26. jardunaldian aurrez aurre aritu dira Reala eta Athletic Zubietan jokatutako partidan, eta urrezko hiru puntu eskuratu dituzte bilbotarrek. Lehen minutuetan eginiko bi goli esker jarri da aurretik, eta Realak gol baten bidez aldea murriztu duen arren, garaipenari eutsi dio Athleticek.
Txuri-urdinak baino indartsuago zelairatu dira zuri-gorriak, eta hirugarren minuturako egin du lehen gola Yulema Corresek. Cristina Cornejo atezainaren aurrean bakarrik gelditu da, eta lehen saiakeran Cornejo nagusi izan bada ere, bigarrenean baloia sareratu du Corresek. Hiru minutu geroago, hegaletik Eunatek jaurtitako falta ezin izan du gelditu Cornejok.
0-2koarekin joan dira taldeak atsedenaldira. Bestelakoa izan da partida bigarren zatian, ordea; aurrera egin du Realak, eta 79. minutuan lortu du Sandra Ramajok 1-2koaren gola, buruz. Reala hamar jokalarirekin gelditu da 82. minutuan Itxaso Uriartek txartel gorria ikusi eta gero, baina izan du hala ere berdinketaren gola egiteko aukerarik; luzapenean Nahikari Garciak izan du aukera garbiena, baina atezainak gelditu du baloia.
Hiru puntuak lortuta, lehen postuan da berriro Athletic, 69 punturekin eta Bartzelonak baino bat gehiagorekin. Realak, berriz, laugarren postuan jarraitzen du 52 punturekin. Datorren astean, Realak Bartzelonaren zelaian jokatuko du, eta Athleticek derbia izango du berriro ere; Oiartzunekin, Lezaman.
