Martxoa gozoa gertatzen ari zaio Athletici. Espainiako Ligan Realaren kontra galdu eta Europa Ligan Marseillarekin berdindu zuenetik, irabazi besterik ez du egin: partida bat Europa Ligan, eta lau jarraian Espainiako Ligan. Betisi irabazi dio laugarrena, aise.
Lehen zatian bideratu du partida Athleticek. 34. minutuan, Sabin Merinok sartu du etxekoen lehen gola, eta atsedenaldira joan aurretik handitu du aldea Mikel Ricok, 44. minutuan. Lehen zatia ongi amaitu, eta berdintsu jarraitu du bigarrenean; zelairatu eta bost minutura, Merinok bere bigarren gola eta Athleticen hirugarrena sartu du. Partida, erabakita. Bost minutu falta zirela sartu du Ruben Castrok sevillarren gola.
29. jardunaldia amaituta, seigarren da Athletic, 47 punturekin. Datorren igandean, Espanyolen zelaian jokatuko dute zuri-gorriek, baina ostegunean Valentzian dute Europa Ligako itzulerako partida.
