Baionak, lehen sei postuetako lehian segitzeko, Briveri irabazi behar dio

Baionak Europako Challengeko porrota fite ahantzi beharko du, ez baitu batere partida erraza izanen bihar Briveko Amedee Domenech zelaian. 19:30ean, Briveren aurka arituko da Lapurdiko hiriburuko hamabostekoa.

Baionarrak Top14ko lehen sei postuen ateetan daude, Toulon seigarrenetik puntu bakarrera baitaude. Gauzak, baina, arras estu daude, Miarritze laugarren sailkatutik Paris hamargarrenera lau putu eskasen aldea baitago. Brivek, berriz, azken-aurreko postua saihesteko borroka bizia dauka Agen eta Arroxelarekin, eta mailari eusteko lehian dabil. Xuri-beltzek Heineken kopan sartzeko asmoz ekin zioten ligari, baina hasieran gaizki-gaizki ibili ziren eta beren burua salbatzea da orain helburua.

Baionak argi ibili beharko du, halere. Brive bolada onean da, azken hiru partidak irabazi baititu, tartean Clermont Top14ko txapeldunaren aurkakoa. Baiona, aldiz, maldan behera doa, Challenge kopan hurrenez hurren Connacht eta Harlequinsen kontra galtzaile atera baita. Martxa zuzendu beharko du Lapurdiko hiriburuko taldeak, Top14an aitzinean jarraitzeko.