Espero zen bezala, aurkari zailak izango dituzte Bera Berak eta Itxakok Europako lehiaketetan. Donostiarrek Alemaniako txapeldunaren aurka jokatu beharko dute Europako Errekopako final-laurdenetan. Joaneko partida Donostian jokatuko dute, martxoaren 9-10eko asteburuan, eta itzulikoa Erfurten, Alemanian, astebete geroago. Thueringerrek Txapeldunen Ligan ekin zion denboraldiari, eta oso talde indartsua da. Alemaniarrak kanporatuz gero, Volgograd-Hypo kanporaketako irabazlearen aurka jokatuko du Bera Berak Europako Errekopako finalerdietan. Kasu horretan ere etxean litzateke joaneko partida, eta etxetik kanpo itzulikoa.
Itxakori, berriz, Zalau Errumaniako taldea egokitu zaio EHF kopako final-laurdenetan. Joaneko partida Lizarran jokatuko dute nafarrek ere, eta itzulikoa Errumanian. Erronka zaila du Itxakok, baina, aurrera eginez gero, Astrakhanotxka-Metz kanporaketako irabazlearen aurka jokatu beharko luke. Final-zortzirenetan bezala, ondo bidean, Errumanian jokatuko ditu Itxakok bi partidak; kasu horretan, asteburu berean jokatuko lirateke bi partidak.
