Ligako bisitari onena, etxean puntu gehien lortu dituen taldearen aurka. Partida gogorra du gaur Bera Berak, liga irabazteko borrokan. Sailkapenean bigarrena den Ro' Casaren aurka neurtuko ditu indarrak. Hiru jardunaldiren faltan bi punturen aldea dute donostiarrek. Kalkuluak errazak dira. Bera Berak irabaziz gero, lau puntu gehiago lituzkete kanariarrek baino, eta gol aldea ere, alde. Hirugarren urtez jarraian liga irabaziko luke, beraz.
Galduz gero, gol aldea zaintzea ere garrantzitsua izango da Bera Berarentzat. Joanekoan 25-20 gailendu ziren, Bidebietan. Bost gol baino gutxiagorengatik galduta, eskura geldituko litzaioke titulua. Alde handiagoarengatik galduta, berriz, asko zailduko litzaioke helburua lortzea.
Monche Puche entrenatzailek gogoz ikusten du bere taldea: "Partida zaila da Ro' Casaren aurkakoa, baina ondo ari gara entrenatzen, intentsitate handiarekin. Badakigu zer dugun jokoan".
